無聊雜記

最近天氣轉涼，又涼唔哂，日頭熱，夜晚凍，好易病，結果我就病左啦。

最初係我冷親傷風，之後傳染左俾我老婆。等我好番 d，佢又傳番俾我。到佢無咁嚴重，又到我傳番俾佢。我去打下羽毛球，出身汗以為好番 d，佢又傳番俾我....如是者，loop 死左。

有個大學同學仔即將成家立室，準新娘子又係我同事，佢地搵我幫手做兄弟。咁大個仔，結過婚，但係未做過兄弟，一於應承。

早兩日，幫佢手過大禮做苦力。個陣我好多野都係利是代替，佢就唔同，幾乎樣樣都真材實料。我地先太子取貨，三個人六袋野，搭半個多鐘巴士過海。一向容易暈浪的我，尚且頂得順。去到，不得了。準外母一人整碗湯圓，細細粒好似糯米丸子個 d，一碗起碼有一打不特止，仲要整多兩隻蛋，真係捧住個肚走。走個陣，更犀利，六袋野黎，七袋野走，仲有水桶同痰盂....搭的士返男家，結果都係頂唔順，暈了....車浪。即是閃返屋企抖，外加飽足兩日。再一次慶幸自己媽子同外母都係隨和之人。

唔知各位男士既外母/準外母/女友媽咪係咪咁，走個陣同準新郎傾開，佢準外母同我外母都好鍾意叫人食野，食飯個陣食多 d 飯；食完飯食多 d 餸；食夠餸就食生果；臨走仲俾兩個你拎走。唔怪得有拖拍同結左婚既男士身材都日漸「圓潤」了。各位男士共勉之！