兄弟

之前幫佢手過大禮既友人 S 上星期做老襯，搵我幫佢做兄弟。

自己婚都結左，做兄弟反而係第一次。無他，一班相熟男性朋友之間我係最早結婚個個。相信係不久將來佢地都會陸續有行動....我希望。

做兄弟，當然無做新郎哥咁辛苦，至少事前唔駛咁多準備工夫。正日多唔多野做，就睇下新郎哥對你好唔好，同佢事前準備充唔充足啦。今次呢位朋友....我第一次做兄弟就搵我做晚宴 MC....好彩，都仲有時間食。

結婚個對固然開心，做兄弟姊妹既都玩得開心。加上出席既除左親友，因為一對新人都係我同事，新郎又係我大學同學，所以不少都係我識既人，玩起來都特別投入。美中不足係....我地大老闆都有出席，我知佢地係唔想請佢的，依家仲話要拎佢地 d 結婚相去做公關宣傳....嗯....唔關我事！

下次唔知又到邊個老襯搵我做兄弟啦，係你，你，定係你呀？