搬屋記

搬屋真係一件好麻煩既事。
(煩到我用白話寫既心幾都無...)

可能今次搬得比較倉猝，由決定搬到搬個日，前後唔到一個月，我地居然可以執好哂...umm...執好 90% 野，以我既返工時間，算做有效率。好彩老婆之前請左幾日大假諗住抖下...

如果唔係為左囡囡，其實唔係咁想搬。之前個度係自己咁大個仔第一間買既樓，而且好鍾意個環境，靜之餘附近又多樹，而且都算方便。不過為左囡囡唔駛日日舟車勞頓，都係決定搬近我娘親。離開左三年幾，估唔到咁快又搬返去何文田區了。

講返搬屋...

因為時間倉猝，又唔想煩，就請左搬屋公司幫手。佢地俾左一堆紙箱膠袋同包裝用品我地，我地就開始裝箱入袋。大件的唔算煩，最煩係個 d 濕濕碎碎野，又唔知點放，又驚打爛。仲有就係老婆大人 d 衫....女人野....大家心中有數....

如此這般，開 turbo 執左幾日，頭都大，人都癲。執到最後一刻，結果都執唔哂，剩番小小濕碎野，我地都放棄了。因為實在太攰。不幸地，搬運公司又遲到。來到開始包裝上車，已經下晝三點幾，到五點幾先上哂貨車開得車。以為順利，去到新屋樓下就有車位，掂知前後唔夠位開唔到貨車個尾板，要等多大半個鐘等前面車 d 人返來開車，先可以開始搬。結果到七點幾先搬好哂。之後我地就即時安頓好必須既野....我地同囡囡床同洗手間！留低一堆未開紙箱同膠袋，第時再算啦。

又不幸的，搬完之後一段時間我地都無假期，結果 d 野執左個幾星期，到今日都仲有野未放好，不過總算安頓左 90% 既野，都舒服左不少。陸陸續續應該有更多野煩，見招拆招啦。

如果下次再搬，一定要更加有計劃先得。

煩時煩....搬左返來，老婆又可以行路返工，我又可以半個鐘之內返到 office，偷左不少發夢時間，都幾開心！呵呵